Tatoli Ba Ministériu Saúde, Justisa, ESTATAL Ho Orgaun Relijiouzu Sira

Hakbiit Inan-Aman Forte Iha Nasaun Ida-Ne’ebé Forte

Reflesaun Iha Ámbitu Komemorasaun Loron 30 Agostu 2019

Hosi. Carinton Salazar Gonzaga Freitas

A.     Prefásiu

Eransa kolonializmu husik hela istória malahok, naruk no nakonu ho tristeja ho sofrimentu. “Ohin amigu aban sai inimigu. Ohin inimigu aban sai fali amigu.” Kultura ida ne’e eziste iha aspeitu hotu-hotu tantu iha aspetu sosial no iha seitor moral sira nu’udar umana.

Istoria naruk Timor-Leste nian, la ses hosi liafuan “FUNU” no funu ne’e rasik rejulta buat barak sai hanesan alvu ba destruisaun sira. Tinan barak povu Timor-Leste enfrenta krize oin-oin.

Haksumik hosi krize ida, hakat fali ba krize seluk. Sékulu moris iha Timor-Leste iha okupasaun nian terus tebes. Ema barak mate, lakon ninia riku no soi, fahe malu. Asuwa’in barak saran sira-nia vida, sira-nia ruin ho raan lekar namkari lemorai ba rai doben ida ne’e.

Inan feto barak moris faluk, oan ki’ak barak lakon sira-nia inan, lakon sira-nia aman, Inan feto barak mós sai vitima ba eksploitasaun sexual, maun alin oho malu no problema sosial oin-oin. Hakarak hakilar karik, hakilar ba se? konsekuensia hosi liafuan “FUNU” ne’e mak karik nune’e ona.

Desvia tiha hirak leten ne’e atan ha’u orgullu nu’udar timoroan. Hahu hosi Don Boaventura iha tinan 1912 iha funu Alas-Manufahi, kontra okupasaun portugés.

Iha tinan 1975 timoroan lubuk ba lubuk hamutuk kontra okupasaun Indonesia bele dehan timoroan sira, iha ona sira-nia sentidu nasionalizmu ho patriotizmu ne’ebé boot ba rai doben ida ne’e. “MATE KA MORIS UKUN RASIK ÁN”

Entusiasmu povu Timor-Leste nian ba ukun aan iha 30 Agostu 1999. Iha tinan rua nulu (20) liubá. Atu korre án hosi korente invasor, positivu tebes. povu tomak, hosi loro sa’e to’o loro monu, tasi feto to’o tasi mane, Oecusse to’o Jaco. Hotu-hotu iha fileira ida, rejeita OTONOMIA asseita INDEPENDENSIA.

Timor-Timur (dalen indonézia) nakfilak hikas ba Timor-Leste (tetungés ou tetun portugés). Ne’ebé antes ne’e, provinsia ba dala rua nulu resin hitu (27) hosi Negara Kesatuan Republik Indonesia (NKRI).

Durante dekada rua resin, tinan rua nulu resin haat (24). Povu Timor-Leste, moris iha ditadura liman besi, Rejime Soeharto nia ukun.

04 Setembru 1999 hafoin referendu liu tiha loron lima (05). Mais aumenus tuku sanulu (10) dadersan Otl. Nasoins Unidas (NU) abertamente fo sai rejultadu kontajen votu iha Nova Lorke, no hatudu katak maioria povu Timor-Leste hili rejeita otonomia ho pursentu % 78,50  no Otonomia hela ho % 21,50.

Iha loron ne’e Independensia hahu. Wainhira fihir hosi ha’u nia oklu. Tamba Indonesia atu halo rahun Timor-Leste, fahe tiha ba atus ba atus mós idependensia ona.

No Timor-Leste mós rejistu ona, iha lista naruk NU nian, Timor-Leste nu’udar nasaun dala atus ida sia nulu resin ida (191) NKRI de’it sei la bele muda satán milisia gabasola ho rakitan hehe.

Hafoin ida ne’e, iha 20 Maiu 2002. Timor-Leste mós restaura ninia independensia iha oras 00.00 Otl kalan. Ne’ebé hetan sasin direta hosi Sekretariu Geral Nasoins Unidas nian altura ne’ebé saudozu Kofi Annan.

2019 Ohin timor-leste mós restaura ninia independensia ba tinan 17 ona. Demokrasia ho independensia ne’ebé eziste iha Timor-Leste hetan evolusaun hosi tempu ba tempu iha repúblika ida-ne’e, loron ba loron kontinua muda án.

Konside ho labarik foin moris karik agora boot ona se kompara ho inan feto sira karik, agora haree ona ninia séklu menstruasaun. Ema karik ema duni ona, feto karik mós feto duni ona.

Iha komemorasaun ba tinan 20 UNAMET mai iha Timor-Leste inklui loron istóriku referendu 30 Agostu hakerek na’in hakarak harame hikas ho hanoin simples balun. Hakarak hakbiit inan-aman foun sira ou sira ne’ebé foin harii uma kain. Liuhosi sikun parte relevante sira-nian.

B.     HAKBIIT UMA KAIN FOUN FORTE IHA NASAUN IDA-NE’EBÉ FORTE

Matenek sira hosi postu dekonstrusaun modernizadu dehan mundu agora dook hosi pensamentu kognitivu maibé hanesan ema Timor ita orgullu tanba ita seidauk lakon ita-nia identidade original.

Iha ita-nia sosiedade sei eziste nafatin aspetu Matrilineal no Patrilineal no hakbiit liután ho fetosá ka umane hafolin ou barlake. Ida ne’e mak matenek na’in sira hosi postu dekonstrusaun modernizadu haluha liu-liu iha Timor-Leste.

Uma kain iha definisaun rua ida mak familia orijen ka familia konjugal (conjugal family) ne’ebé entre lain, feen ho oan sira ne’ebé iha relasaun interdependensia.

Seluk mak familia konsangin (Consanguine Family) ne’ebé mós bele mai hosi subriñu, tia, avo hosi parte seluk, ne’ebé sei iha relasaun ho raan nian ne’ebé hela hamutuk iha fatin ida.

Familia dook mai hela hamutuk bele mós dehan extended family ka familia extende (Narwoko ho Suyanto,2004,p.14).

Haree hosi sikun ho lidun barak Iha ita-nia sosiedade liu-liu iha Timor-Leste. Aman sira dalawain haluha oinsá, serve ninia familia (parseiru) ho rajaun oioin. Haluha katak uma kain ida bele la’o tanba iha ema na’in rua (feen ho laen) iha komitmentu no objetivu atu alkansa ba futuru nian mak foin moris hamutuk.

Aman balun laiha interese hatene kona-ba feen/inan nia kondisaun tanba hotu-hotu dehan ne’e feto nia servisu ou balun dehan servisu barak presiza deskansa entaun hosik hela inan ka feen nu’udar pilar importante ba haree uma laran liu-liu (kosok) maibé ne’e la loos. Aspetu hotu-hotu ne’ebé iha uma kain ida nia laran responsabilidade hamutuk.

Stigma sosial ida-ne’e sei nafatin buras iha sosiedade tanba iha ligasaun ho kultura ne’ebé ninia abut metin iha artigu ida-ne’e hakerek na’in hakarak deskreve kona-ba papel aman sira-nian iha sosiedade Timor-Leste.

C.     PASU IMPORTANTE NE’EBÉ PRESIZA AMAN SIRA HATENE LIULIU KUIDA FEEN MAK HANESAN;

1.       Aman mak ativu no responsavel jeral, no másimu ba uma kain iha aspetu isin no klamar nian ba parseiru (feen).

2.       Hatene kuida feen, durante periudu isin rua.

3.       Fó hanoin no suporta feen hakbesik ba fasilidades saúde rutinamente.

4.       Hatene fó primeiru sekoru wainhira akontese risku ruma ba inan ho kosok liu-liu iha periodu kous mak hanesan;

Ø  Halo intervensau dahuluk wainhira feen oin halai ruma durante perioudu kous

Ø  Halo intervensaun ba feen wainhira muta makas iha periudu kous

Ø  Halo intervensaun wainhira feen raan sai makas.

Ø  Halo intervensaun wainhira feen susar hán hahán durante periodu kous (morning sickness)

Ø  Fó Hahán suplementu di’ak ba feen durante periodu kous

Ø  Fó Hahán suplementu ne’ebé di’ak ba feen hodi apoiu kresimentu ba bebe iha kanotak.

D.     PASU IMPORTANTE NU’UDAR AMAN PRESIZA HATENE BA KUIDA BEBE HAFOIN MORIS MAK HANESAN TUIR MAI;

1.       Fo hariis bebe ho kous wainhira inan moras ou la konsege halo ninia knaar

2.       Koñese hahan di’ak no saudavel ba bebe liu-liu ba ninia kresimentu

3.       Koñese susu-been di’ak ba bebe durante kiik

4.       Hatene hadook labarik hosi risku sira hanesan eletrisidade ou fugaun ka buat selu-seluktan ne’ebé la serve ba bebe hodi halimar.

5.       Akompaña dezinvolvimentu labarik nian wainhira sei kiik too boot

6.       Eduka no responsabiliza ba labarik to’o nia hetan ninia vida rasik.

Koalia kona-ba uma kain ita koalia kona-ba individu hirak-ne’ebé moris hamutuk iha fatin ida no iha ligasaun 

interdependensia ba malu. No hosi uma kain mak harii xefé familia, xefé aldeia, xefe suku to’o xefe estadu ka parte 

seluk povu mai hosi nukleu ki’ik uma kain. Uma kain atus ba atus rihun ba rihun hamutuk mak forma estadu ida.

Atu hakbiit uma kain sira saida mak nu’udar estadu presta ba sira? Iha servisu multisektoral ne’ebé ne’ebé wainhira bele organiza ho diak ninia nakait bele fó rezultadu ida-ne’ebé diak.     

     

Presija tulun makas hosi partes relevantes sira hanesan Ministériu Saúde, Justisa, ESTATAL nomós orgaun relijiouzu sira-ne’ebé iha Timor-Leste.

E.      MINISTÉRIU SAÚDE NIA PAPEL

Minsteriu saúde nia papel ne’ebé presija tulun inan, aman sira liu-liu hare hosi sikun autor nian mak; formasaun ba uma kain foun sira tamba iha lisaun sira balun hetan maibé balun la hetan durante iha kareira eskolar ou balun mos la eskola.

Edukasaun ba biolojia liu-liu kona-ba anatomia no area sensitivu sira (mane presiza hatene area sensitivu feto nian nune’e mós ba feto)

Fó koñesimentu kona-ba oinsá sexu durante periudu kous (sa fulan sa oras mak bele halo sexu)

Hanorin inan aman sira, kona-ba pasu oinsa proteje inan ho kosok wainhira iha periudu kous.

Hanorin pasu oinsa kous bebe, fo haan bebe, fo haris bebe, no atendementu ba bebe durante sei kiik. Oinsa garantia inan nia susu been durante periudu fo susu, karik apoiu susu been extra oinsa ninia risku no parte negativu sira.

Iha fatin Nasaun balun wainhira inan ida atu ba partus iha fasilidades saúde aman presija hetan sertifikadu formasaun kona-ba oinsa kuida inan ho kosok.

No ba inan sira ne’ebé laiha kaben ka laiha ema ne’ebé responsabiliza ba nia án presiza sasin ida liu-liu inan aman hosi inan ne’ebé atu partus ne’e atu nune’e la difikulta prosesu durante hetan asistensia iha ospital ka fasilidades saúde sira seluk.

F.      Papel Ministériu Justisa nian

Justisa mós parte ida-ne’ebé haree kona-ba oinsa oinsa tulun uma kain foun sira. Liuhosi edukasaun sivika atu sira bele hatene liután sira-nia direitu sidadania, nomós fasilita formasaun ho dokumentus sel-seluk tan ne’ebé relevante ho direitu sidadania nian. Parte ida atu kuda espiritu nasionalizmu iha kada sidadaun nia fuan.

1.       Fasilita formasaun báziku kona-ba diretu sidadania nian (saida mak bele halo ba estadu no saida mak estadu bele halo ba ninia sidadaun)

2.       Fó koñesementu kona-ba simbulu Nasaun nian Hino Nasional, signifikadu hosi badeira no selu-seluktan.

3.       Fasilita sertidaun RDTL sertidaun ba labarik sira ne’ebé foin moris

G.     Ministériu ESTATAL

liuhosi autoridades administrativa ho autoridades lokais sira mobiliza partesipasaun komunidade sira-nian liu-liu ba uma kain foun sira atu bele hetan formasaun baziku sira ne’ebé mensiona iha leten. Hala’o servisu integradu ida entre autoridades lokais ho knaar nain saúde sira atu identifika uma kain foun sira hetan formasaun.

H.     Papel Orgaun Relijiouzu

Ikus liu mak partes orgaun relizioju sira, ne’ebé partense ba vida klamar nian, akompaña ho akonselamentu moral oinsa bele hetan harmonia iha vida uma kain.

1.       Fasilita mos sertidaun batizmu ka sertidaun sira seluk, depende reliziaun ne’ebé sira fiar ba.

2.       Dudu ho korazen ba uma kain foun sira atu bele hetan lalais sira-nia matrimoniu

Hanoin hirak iha leten nee, autor hakerek ho pensamentu simples, atu realsa deit katak formasaun ba inan aman foun sira la’ós edukasaun formal maibé apoiu inan aman foun sira.

Hosi hanoin sira iha leten wainhira inan-aman foun sira hetan ona formasaun baziku kada ema ida bele hetan koñesementu di’ak liutan iha uma kain/uma laran no espesialmente iha sosiadade.

Husu Ministériu Saúde, Justisa, ESTATAL ho Orgaun Relijiouzu atu tuur hamutuk halo kordenasaun multi-sektoral hodi estabelese metudu formasaun ida-ne’e di’ak ba uma kain foun sira.

Modelu formasaun bele durante loron tolu, oras tolu, ka semana tolu depende ba modul ne’ebé sei utiliza hodi hanorin.

I.        Konkluzaun

Antes hakotu hakerek na’in hato’o parabens no Gloria ba povu maubere tomak. Inan-aman, maun-alin asuwa’in sira-nia dedikasaun no luta hosi frente hotu-hotu ba Timor-Leste nia ukun án. Hakruuk boot ba inan-aman sira iha Frente Armada, Klandestina ho Diplomata ba servisu badinas la sura kolen salariu no selu-seluktan hodi ohin ita hotu goza Liberdade.

Liuhosi artigu ida-ne’e hakerek na’in ezije ba parte kompetente sira ne’ebé mensionadu iha artigu laran atu tau iha konsiderasaun no espera bele servisu hamutuk ho liña kordenasaun di’ak no integradu ida hodi hakbiit ita-nia uma kain foun sira iha RDTL.

Wainhira pasu sira-ne’ebé deskreve iha artigu ida ne’e parte relevantes sira bele tau iha konsiderasaun mak hamenus ona violensia bazeia ba jeneru ka violensia doméstika.

Hakbiit liutan ema nia koñesementu kona-ba vida moris iha sosiedade atraves hosi uma kain foun sira.

Hakbiit ema nia koñesementu ema nian kona-ba saúde no moris saúdavel detallamente kona-ba moris iha vida kazal nian.

Fasilita sidadaun valoriza moris nu’udar sidadun ne’ebé onestu, tanba sira hetan ona edukasaun civika ne’ebé adekuadu.

Artigu simples ida ne’e autor hakerek la reprejenta instituisaun ne’ebé autor haknaar án ba.

Maibé nu’udar opiniaun hanesan sidadaun simples iha TimorLeste.

Dedika espesial ba governantes sira hotu iha ámbitu selebrasaun loron konsulta popular.

Carinton Salazar Gonzaga Freitas

Hakerek na’in livru MIPLIN & Desterradu Polítiku

Kritikas no ideias bele dirige mai Email: carinton15@gmail.com
Kontaktu: +67077903355

Hakru’uk ho hakuak boot.